Жүжигчин Отгоо Архангай аймгийн нутгийн зөвлөлөөс зохион байгуулсан 2019 оны уулзалтанд очихдоо ийнхүү ярьжээ.

“Өнөөдөр сайхан өдөр байлаа. Нутгийн зөвлөлийн энэхүү уулзалтанд миний бие анх удаагаа ирж байна. Баяртай байна. Ийм сайхан арга хэмжээ зохион байгуулсан гишүүддээ баярлалаа гэдгээ хэлмээр байна.

Бусад аймгууд дандаа л иймэрхүү нутгийн зөвлөлийнхөн ингэж уулзлаа, тэгж уулзлаа гэж яригддаг. Архангайд нутгийн зөвлөл байдаг юм болов уу гэж би дотроо боддог байсан. Яагаад гэвэл анх удаагаа нутгийн зөвлөлийн уулзалтанд ирж байгаадаа баяртай байна” хэмээн хэлээд оролцож байсан юм.

Нэг. Б.Отгонтуяа нь хоёр эгч, гурван ахтай айлын бага охин. Тэрээр Архангай аймгийн уугуул бөгөөд багаасаа аймагтаа зохиогддог байсан бүх тэмцээнд оролцдог авьяаслаг хүүхэд байжээ.

Хоёр. Жүжигчин болохыг хүүхэд байхаасаа мөрөөдөж энэ мэргэжлийг сонсгосон бөгөөд 1998 онд 10 дугаар ангиа төгсөхөд нь СУИС-ийн хуваарь Архангай аймагт ирээгүй тул аймгийн театртаа дөрвөн жил ажиллажээ. Харин тэрээр 2002 онд СУИС-д элсэн орж найруулагч Н.Ганхуяг багшийн удирдлага дор төгссөн байна.

Гурав. Тэрээр “Шинэ үе” продакшнд 2003-2016 он хүртэл ажиллажээ. Энэ тухайгаа “Ангидаа сууж байтал Бооёо ах намайг дууддаг юм байна. Гараад очтол “Чи манай хамтлагт тоглох уу” гэсэн. Миний хувьд гайхах, баярлах зэрэгцэж шууд л зөвшөөрсөн. Тэр бол миний амьдралд тохиолдсон сайхан мөчүүдийн нэг яах аргагүй мөн” хэмээн ярьжээ.

Дөрөв. Тэрээр нөхөртэйгөө СУИС-д суралцаж байгаад танилцжээ. Тэрээр өдгөө “Алдарт эхийн одон” хүртсэн дөрвөн сайхан хүүхдийн ээж билээ. Б.Отгонтуяа нөхрийнхөө тухай “Манай нөхөр намайг маш сайн ойлгодог, хайрладаг. Хүний хувь тавилан гэдэг сонин. Учрах ёстой хүмүүс учирдаг, уулзах ёстой хүмүүс уулздаг” гэсэн байдаг.

Тав. Жүжигчин Б.Отгонтуяагийн гол дүрийг бүтээсэн “Эрвээхэйн сүүдэр” олон ангит кино дэлгэцнээ гарч буй. Тэрээр өмнө нь “Хөгжилтэй дүр”, “Хөгжилтэй өдөр”, “2 хоёрын 5” зэрэг кинонд гол дүр бүтээснээс гадна “Сарны гөлөг”, “Single Ladies”, “Их хотын залуус”, “Би дуралмаар байна”, “Галзуу зугаалга”, “Бүтэн амьдрал” зэрэг киноны дүрүүдэд тоглдож байсан юм.

Зургаа. Тэрээр 2017 оноос “Мөрөөдлийн театр”-т орсон бөгөөд тус ондоо хошин урлагийн шилдгүүдийг тодруулах “Азтай бадарчин” наадмын “Шилдэг эмэгтэй жүжигчин” номинацид нэр дэвшиж цомын эзэн болж байв.

Долоо. Монгол Улсын Ерөнхийлөгч У.Хүрэлсүх энэ оны гуравдугаар сард салбар бүрийн тэргүүлэх мэргэжилтнүүдэд төрийн дээд цол, одон медаль гардуулсан. Түүний нэг нь жүжигчин Б.Отгонтуяа. Тэрээр төрийн дээд “Алтан гадас” одон хүртсэн юм.

Найм. Жүжигчин Б.Отгонтуяа 2012 онд Монгол Улсын Соёлын тэргүүний ажилтан цол хүртэж байжээ. Түүний цол тэмдийг 2012 оны “Эрчүүд эхнэрээсээ айдаг” тоглолтынх нь үеэр гардуулан өгч байв.

Ес. Тэрээр нэгэн ярилцлагадаа “Ихэнх жүжигчин бүсгүйчүүд түүхэн дүрд тоглох юмсан гэж их боддог. Би болохоор шал эсрэг, боевик эмэгтэйн дүр бүтээхийг хүсдэг. Америк кинонд гардаг зодоонч, аймаар бүсгүйчүүд байдаг ш дээ. Тийм дүрд тоглох юмсан гэж их боддог. Ийм сэдэвтэй кино хийвэл үзээд алдана гэж бодож байгаа” гэсэн байдаг.

Арав. Харин тэрээр Отгоо гэж хэн бэ гэсэн асуултад “Энгийнээр хариулахад хэлье гэснээ хэлчихдэг, шударга, байгаагаараа л байдаг олон таван аашгүй л хүн. Жирийн л нэг жүжигчин бүсгүй, онц гоцлоод байх зан чанар байдаггүй.

Ганц гэм нь эмэгтэйлэг зан ховортой, эршүүд талдаа шүү. Хүнд амархан гомддог, түргэн ууртай боловч эргээд маш хурдан мартчихдаг. Нэг л мэдэхэд инээчихсэн явдаг. Цагаахан л юм даа. Урлагийнхан ер нь тийм зан чанартай байдаг л даа. Амархан хөөрч баярлана, амархан гомдоно” хэмээн хариулжээ.

-Хошин урлагийн “Азтай бадарчин” их наадмын “Шилдэг эмэгтэй жүжигчин” төрөлд шалгарсанд тань баяр хүргэе. Энэхүү наадамд хэд дэх удаагаа оролцож байна вэ?

-Баярлалаа. “Шилдэг эмэгтэй жүжигчин” төрөлд шалгарсандаа баяртай байна. “Азтай бадарчин” наадмын “Шилдэг эрэгтэй жүжигчин” төрөлд “Мөрөөдлийн театр”-ын жүжигчин, Соёлын тэргүүний ажилтан Д.Баттөмөр (Батаа), “Шилдэг шог зураг”-ийн төрөлд алтан цомын эзнээр шог зураач А.Бат-Эрдэнэ, “Шилдэг хамтлаг”-аар “Маск” продакшны уран бүтээлчид маань тус тус шалгарсан.

Ийнхүү “Азтай бадарчин” наадам маань 13 жилийн дараа дахин боллоо. Жүжигчдийн чадвар, чансааг сорьсон өрсөлдөөнтэй наадам болж өндөрлөлөө гэж бодож байна. Намайг яг хошин урлагийн жүжигчин болж байх үед тус наадам зохиогдохоо больчихсон юм. Тиймээс би анх удаагаа оролцож байгаа минь энэ л дээ.

Энэ удаагийн их наадам үзэгчдээс санал асуулга авснаараа онцлог байлаа. Мөн хошин урлагийн хамтлаг продакшнууд хамтран үзүүлбэрүүдээ толилуулснаас гадна шилдэг жүжигчний төрөлд нэр дэвшиж байгаа тус бүр таван эрэгтэй, эмэгтэй жүжигчинд шүүгчдийн зүгээс даалгавар өгсөн.

Тодруулбал, хоёр, хоёроороо хамтран тухайн үед сугалсан сэдвийн дагуу таван минутын дотор богино хэмжээний үзүүлбэр үзүүлсэн юм. Мөн жүжигчин ах нараасаа нэгийг нь сонгох боломжтой байсан. Миний хувьд “Эмоци” продакшны жүжигчин Тэмүүжин, “Маск” продакшны жүжигчин Баярмагнай ахтайгаа хамтарсан.

Энэ даалгавар хэн нь хэн бэ гэдгийг таниулж, жүжигчдийн чадвар, чансааг утгаар нь харууллаа гэж би бодож байна. Хамтран тоглосон найз Тэмкадаа болон, Магнай ахдаа маш их баярлалаа. Мөн Магнай ахтайгаа тайзнаа анх удаа хамт гарсан сайхан тохиол болсон.

-Тус наадамд өнөө үеийн хошин урлагийн төлөөлөл болсон бүхий л мундаг жүжигчид өрсөлдсөн. Таны хувьд өөртөө хэр итгэлтэй байсан бэ?

-Үе тэнгийн найзууд болох Гэрэлээ, Жавхаа маань болон мөн дүү нар өрсөлдлөө. Тэд маань бүгд л маш мундаг уран бүтээлчид. Миний хувьд түрүүлчих байх гэсэн бардамнал бол байгаагүй. Яах бол гэсэн айдас, догдлолтой л байлаа. Тайзнаа гараад хийх ёстой зүйлүүдээ гүйцэтгээд, үзээд алдъя л гэж бодсон.

Мэдээж тэмцээн уралдаан учир нэг нь түрүүлдэг жамтай шүү дээ. Ямартай ч “Азтай бадарчин” бол хошин урлагийн салбарын жүжигчдийн хувьд том наадам, шагнал байдаг. Тиймээс энэ том наадамд шалгарсан болохоор баярлахын сацуу үүрэг, хариуцлага минь улам нэмэгдэж байгааг ойлгож байна.

-Жүжигчин болсон тухайгаа яриач. Хүүхэд ахуй насандаа мэдээж авьяаслаг охин байсан болов уу?

-Миний багын мөрөөдөл жүжигчин болох байсан. Харин гэр бүлд минь урлагийн хүн байхгүй. Миний аав жолооч, ээж минь тогооч мэргэжилтэй. Энгийн л ажилчин хүмүүс. Яахав, аав минь сайхан дуулж, хөгжимдчихдөг.

Ямартай ч миний хувьд багын мөрөөдөлдөө тууштай явсаар л өнөөдөр жүжигчин гэх эрхэм мэргэжлийг эзэмшсэн байна. Багын л их дүрсгүй, хөдөлгөөнтэй, дуу хөгжимд дуртай хүүхэд байсан л даа. Эмээдээ л дуулж, бүжиглэж, жүжиглэж үзүүлдэг байж билээ.

Дээр үеийн 270-ын цагаан ор гэдэг байсан даа, тэр орныхоо урдуур хөшиг татаад түүнийгээ том тайз мэт төсөөлж, янз бүрийн жүжиг тоглодог байсан. Миний хамгийн анхны үзэгч бол эмээ минь. Ингээд л сүүлдээ Архангай аймгийнхаа Хөгжимт драмын театрын тоглолт, уралдаан тэмцээн гээд бүхий л арга хэмжээнд оролцдог болсон.

Би 1998 онд арван жилээ төгсчихөөд 2002 он хүртэл театртаа ажилласан юм. Учир нь арван жилээ төгсөхөд минь СУИС-ийн жүжигчний ангийн хуваарь ирээгүй юм л даа. Цаг хугацаа их хурдан. Нэг л мэдэхээд дөрвөн жил болчихсон шүү. Ингээд л 2002 онд их сургуульдаа элсэн орж, Найдангийн Ганхуяг багшийн удирдлага дор суралцаж эхэлсэн.

-“Шинэ үе” продакшнд орсон тухайгаа яриач?

-Би 2003 онд буюу хоёрдугаар курст байхдаа “Шинэ үе” продакшнд орж байсан юм. Ангидаа сууж байтал Бооёо ах намайг дууддаг юм байна. Гараад очтол “Чи манай хамтлагт тоглох уу” гэсэн. Миний хувьд гайхах, баярлах зэрэгцэж шууд л зөвшөөрсөн. Тэр бол миний амьдралд тохиолдсон сайхан мөчүүдийн нэг яах аргагүй мөн. Одоогоос 14 жилийн өмнө юм байна шүү дээ.

-Та “Шинэ үе” продакшнаасаа яагаад гарсан юм бэ. Одоо “Эмоци”-д харьяалагдаж байгаа юу?

-Би “Эмоци” продакшнд ороогүй. Хүмүүс орчихсон л гэж эндүүрээд байх шиг байна. Зүгээр л хамтарч уран бүтээл хийсэн юм. Мөн “Шинэ үе” продакшнаас ч яг гарсан юм байхгүй л дээ. Яахав, одоогоор бол чөлөөт уран бүтээлч гэж хэлж болно.

-Таны хувьд урлагийн хүн байхын хамгийн сайхан нь юу вэ?

-Оноогдсон дүрээ тайзнаа гараад амилуулж байх тэр үе бол жүжигчин хүний хамгийн сайхан мөч байдаг. Гэхдээ мэдээж хамгийн сайнаар үзэгчдэдээ хүргэх хариуцлагатай үүрэг хамт дагаж явдаг. Ямартай ч энэ мэргэжлийг эзэмшсэндээ өөрийгөө азтайд тооцож явдаг шүү. Сайхаан сайхан.

Ер нь ч тэгээд хүн хүссэн зүйлээ хийж байна гэдэг амьдралаас авч болох хамгийн сайхан мэдрэмж гэж боддог юм даа. Хөдөө орон нутгаар ч юм уу, тоглолттой явах үед үзэгчдийн минь сайхан халуун дулаан үг маш их урам зориг өгдөг шүү гэдгийг мөн хэлмээр байна.

-Гэр бүлээ танилцуулаач. Хэдэн хүүхдийн ээж болсон бэ?

-Би нөхөртэйгөө 2003 онд танилцсан. Манай хүнийг Гансэлэм гэдэг. Манай доод курсын оюутан байсан юм. Одоо бол хувиараа ажил эрхэлдэг. Хань минь амжилт ололт, алдаа оноог минь дэнсэлж, үнэнчээр дүгнэдэг. Мөн намайг үргэлж тусалж дэмжиж байдаг түшиг тулгуур минь. Тиймээс ханьдаа маш их баярлаж явдаг даа. Манайх ам бүл дөрвүүлээ. Хүү, охин хоёртой.

-Цаашид ямар уран бүтээл дээр ажиллах төлөвлөгөөтэй байгаа вэ?

-Жүжигчин Ганбаа, Сөрөлт бид гурав хамтарч богино хэмжээний кино хийж байгаа. Энэ кино маань удахгүй төлбөртэй сувгуудаар цацагдах байх. Мөн энэ сардаа багтаад залуу жүжигчид хамтарсан тоглолт хийхээр төлөвлөж байна.

Тоглолтод ямар уран бүтээлчид оролцох, хэзээ болох зэрэг талаар үзэгчдэдээ цаг тухай бүрт нь дуулгах болно. Одоогоор тоглолтынхоо бэлтгэлд орчихсон явж байна. Залуу хүмүүс учраас хийх зүйлүүд их байна. Цаашид бодсон, зорьсон ажлууд зөндөө бий.